Naburyong na bebot nanaksak sa St. Luke’s (Walang bakante sa trabaho)

MALUBHANG nasugatan ang isang sekretarya ng isang dentista makaraan pagsasaksakin ng isang babaeng naburyong nang hindi tanggapin sa trabaho sa loob ng St. Lukes Medical Center sa Quezon City kahapon.

Sugatan at nakaratay sa nasabing ospital ang biktimang si Diony Concepcion, 40, sanhi ng saksak sa ulo, baba, at likurang bahagi ng katawan.

Samantala, agad naaresto ang suspek ng mga guwardiya ng ospital, na kinilalang si Laura Cruz, 42, ng Gagalangin, Tondo, Maynila. Narekober sa kanya ang 11 pulgadang kutsilyo.

Sa imbestigasyon, dakong 11:30 a.m. dumating ang suspek sa klinika ni Dr. Angela Castro, dentista, sa 4th floor ng Medical Arts Bldg., ng St. Luke’s para mag-apply ulit ng trabaho.

Nang sabihin ng doktora na walang bakante, nagalit ang suspek, inilabas ang dalang kutsilyo mula sa kanyang bag saka pinagsasaksak ang biktima.

Ayon sa pulisya, maraming beses nang pabalik-balik ang suspek sa klinika para mag-apply ng trabaho sa doktora ngunit walang bakante.

(ALMAR DANGUILAN)