HATAW! D'yaryo ng Bayan hatawtabloid.com
MAGHAHARAP ang dalawang expansion teams ng PBA na Blackwater Sports at Kia Motors sa isang exhibition game bukas sa Alonte Sports Arena sa Biñan, Laguna.
Magsisimula ang laro sa alas-6 ng gabi kung saan ang mga kikitain nito ay mapupunta sa mga naging biktima ng bagyong Glenda na tumama sa Laguna at ibang mga lalawigan sa Katimugang Luzon kamakailan.
Pagkakataon ito ng dalawang koponan upang mag-eksperimento ng iba’t ibang mga kombinasyon bago sila maglabas ng kanilang mga final lineup bago ang pagbubukas ng bagong PBA season sa Oktubre 19.
Kagagaling lang ng Elite sa pagiging runner-up sa Penang Chief Minister’s International Cup na ginanap sa Malaysia.
Inaayos pa ng Kia ang lineup nito kahit pasok na sa roster ni coach Manny Pacquiao sina Paul Sanga, LA Revilla at Alvin Padilla.
“Ang medyo pino-problema namin is ‘yung iba, di pa nakakapirma, so di pa namin tuluyan maayos yung ensayo,” wika ni Kia assistant coach Glenn Capacio.
“Ang critical naman dito is everybody gets along well. Our formula for success hopefully is teamwork, we don’t want to have a superstar who will dominate the team,” ani Siliman Sy ng Blackwater.
(James Ty III)
