Binyag ng anak ‘di matutuloy ama nagbigti

NAGBIGTI ang isang construction worker nang walang maipon na pera para sa binyag ng

kanyang anak sa Dasol, Pangasinan kamakalawa.

Kinilala ang biktimang si James Carlit Centino Laureano, 34, residente sa Sitio

Salabusuban, Brgy. Magsaysay ng nasabing bayan.

Sa imbestigasyon ng pulisya, natagpuan ng misis ng biktima ang bangkay ni Laureano habang

nakasabit sa tabla ng bubong sa terrace ng kanilang bahay.

Ayon sa misis ng biktima na si Gina Bagonia-Laureano, bago ang insidente ay nakipag-

inoman ang kanyang asawa sa dalawang kompare sa Brgy. Bayambang, Infanta, Pangasinan at

naikuwento na hindi matutuloy ang binyag ng kanyang anak sa Agosto 3 dahil wala siyang

naipong pera.

Nakadagdag pa sa problema ng biktima na mawawalan na siya ng trabaho dahil kasama siya sa

tatanggalin sa katapusan ng Hulyo.

Dagdag ng ginang, madalas idaing ng kanyang mister na nahihirapan na siyang maghanapbuhay

bilang construction worker para sa pagkain ng kanilang apat na mga anak at baka hindi

maitaguyod ang kanilang pag-aaral dahil hindi sapat ang kanyang kinikita.

Ilang beses na rin aniyang nagpaalam ang biktima na magpapakamatay.

(JAIME AQUINO)