Sukat na sukat ni Dunoy

Sukat na sukat ng hineteng si Dunoy Raquel Jr. ang kanyang pagdadalang nagawa sa kabayong Love Na Love para sa distansiyang pinaglabanan sa naganap na “Hopeful Stakes Race” nitong nagdaang Sabado sa pista sa pista ng SLLP sa Carmona, Cavite.

Sa alisan ay nauna sila sa lundagan hanggang sa unang kurbada, subalit sa takot ng kanyang mga kalaban na baka makalayag sila ay agaran na nagsigalawan ang maagang nakabuntot kay Love Na Love. Sa pagkakataon na iyon ay bahagyang umawat si Dunoy sa ibabaw at ipinaubaya muna ang unahan kina Marinx, Great Care at Real Lady.

Pagdating ng medya milya ay nagsimula nang gumalaw si Dunoy sa kanyang dala at agaran namang nagresponde si Love Na Love, kaya muli siyang nakalapit sa tatlong nauuna.

Pagsungaw sa rektahan ay nagkapantayan sa harapan sina Marinx at Love Na Love, subalit sa ganda ng puwesto nina Dunoy at natitirang lakas ay nasungkit nila ang tampok na pakarera ng may kalahating katawang agwat laban kay Marinx ni Jesse Guce.

Naorasan ang nasabing laban ng 2:11.2 (25-24-26’-26’-28’) para sa mahabang distansiya na 2,000 meters. Sa panalong iyan ay binabati ko ang may-ari kay Love Na Love na si Ginoong Hermie Esguerra at Dunoy Raquel Jr.

Fred L. Magno