HATAW! D'yaryo ng Bayan hatawtabloid.com
KAHAHANAP NG MATITSIBUGAN NAKALIKAW NI LUCKY ANG BUHAY-DIVISORIA
Kitang-kita namin nina Jay at Ryan na nasapol sa hita ang binaril. Paupong bumagsak sa bangketa. Umaaringking habang hawak ang sugatang hita.
“T-Tata, bakit mo naman ako binaril agad? ‘Di ba dapat, e, warning shot muna?” reklamo ng snatcher.
“Warning-warning shot ka pa r’yan… Pag-aaksaya lang ‘yun sa bala,” ang paasik na sa-got ng pulis.
“ B-Buti na lang, ‘Tang, at sa hita mo ‘ko pinuntirya… P-pa’no kung sa ulo?… Siguro, e, dedo na ako ngayon,” paghihimutok pa ng kawatan sa les-pu.
“Ulul! Sa ulo talaga kita pinatatamaan! Hmp!” ang sabi ng pulis na napakagat-labi.
Napanganga si Jay sa pagkadesmaya.
Nagpatuloy kami sa paglalakad-lakad sa paghahanap ng mura-murang makakainan. Sa kahabaan ng Recto kami napadpad. May mga nagtitinda roon sa kariton ng fishball at kikiam, maming gala, goto at kung ano-ano pang pangkaing-kalye. Nakapwesto naman sa gilid-gilid ng bangketa ang mga nagtitinda ng sari-saring klase ng meryenda, kanin-ulam at bentelog.
“Du’n na lang tayo tsumibug…” pagtuturo ni Ryan sa isang tapsilogan.
“Sige, tena…” pagsang-ayon ni Jay.
Napagawi kaming tatlo sa Divisoria area. Mas makapal na ang tao sa aming paligid. Hindi ka pwedeng magmadali sa paghakbang dahil makababanggang-balikat mo ang kasalubong. At sa unahan mo naman ay kay bagal-bagal ng usad ng mga nasusundan mo. Kasi ba naman, ang tinatawag na mga sidewall vendor ay hindi lang sa bangketa naglalatag ng kanilang paninda. Nasa gitna na rin sila ng kalsada. At naroroon na yata ang lahat: gulay, karne, isda; damit-pambabae at panlalaki (pambata at pangmatanda); gamit sa eskwela at opisina; iba-ibang tatak ng cellphone at mga aksesorya; at kung ano-ano pa. Kaya naman nabanas ako sa lugar na nasuungan namin.
Noon ko napansin ang isang lalaki na parang babaing buntis ang tiyan sa kalakihan. Nakaputing t-shirt at may nakaumbok na bagay sa baywang, sa kada vendor na lapitan ay naglalahad ng palad. Kitang-kita kong tig-bente at tig-singkwenta pesos ang kinokolekta sa bawa’t isa. (Itutuloy)
ni Rey Atalia
