HATAW! D'yaryo ng Bayan hatawtabloid.com
KINOMPIRMA ni Budget Sec. Butch Abad na hindi na nadagdagan o nabawasan ang P2.606 trillion proposed national budget sa 2015 na unang iniharap sa gabinete.
Ang nasabing national budget ay mas mataas nang 15 porsiyento sa 2014 at nakatakdang ihain sa Kamara pagkatapos ng State of the Nation Address (SONA) ni Pangulong Benigno “Noynoy”Aquino III sa Lunes.
Sinabi ni Sec. Abad, pangunahin sa pinaglaanan ng pondo ang Social Protection and Social Services, Job Generation and Economic Expansion, Climate Change Adaptation and Mitigation at Enabling Environment for Inclusive Development.
Ayon kay Abad, wala nang naisingit o naitagong alokasyon para sa pork barrel o ano mang discretionary fund ng mga mambabatas makaraang ideklarang unconstitutional ng Korte Suprema.
Sa 2015 budget, hindi na aniya mauulit ang kontrobersiyal na Disbursement Acceleration Program (DAP) at ayaw nilang labagin ang desisyon ng Korte Suprema.
Batay sa 2015 proposed national budget, ang conditional cash transfer program (CCT) sa ilalim ng social protection ay tinaasan mula P62.6 billion hanggang P78 billion, habang ang National Health Insurance Program ay tinaasan din mula P35.3 billion hanggang P37.2 billion, at ang alokasyon sa basic educational facilities gaya ng classrooms, water and sani-tation ay dinagdagan mula P44.6 billion at ginawang P52.7 billion.
Samantala, ang Department of Public Works and Highways (DPWH) ay tatanggap din nang mas mataas na alokasyon mula P130.4 billion hanggang P186.6 billion.
Ang pondo para sa tourism infrastructure development ay tumaas din mula sa P14.7 billion at ginawang P20 billion.
