Kano nadenggoy ng US$2,500 sa credit card

DUMULOG sa Manila Police District-General Assignment and Investigation Section (MPD-GAIS) ang isang American national na natangayan ng $2,500 kasama ang bagong kaibigan sa isang kilalang Mall sa Maynila, iniulat kahapon.

Kinilala ang biktima na si Kenneth Jerome Reed, 58, ng 362 Mendoza St., San Roque, San Pedro, Laguna.

Sa imbestigasyon ni PO3 Jayjay Jacob, ng MPD-GAIS, naganap ang insidente sa pagitan ng Hulyo 20-23 matapos makilala at maging kaibigan ng biktima ang suspek na si Kenneth Lim Valdez, ng Sapang Palay, San Jose Del Monte, Bulacan, sa Robinson’s Place sa Ermita, Maynila.

Sa salaysay ng biktima, nagkakilala sila ni Valdez, naging magkaibigan hanggang magkasamang nag-check-in sa Soho Hotel ng tatlong araw.

Nagtiwala ang biktima kaya ipinahiram ang kanyang credit card saka ibinalik sa kanya bago umalis noong Hulyo 23.

Nang i-check ng biktima, nalaman niya nakapag-withdraw ang suspek kaya agad siyang nagreklamo sa pulisya. (LEONARD BASILIO/may kasamang ulat ni John Bryan Ulanday)