Misis na dinukot ni mister natagpuan sa hotel

NATAGPUAN na ang negosyanteng ginang na sinasabing dinukot ng kanyang asawa kamakalawa ng gabi, sa isang hotel sa Muntinlupa City.

Ngunit nilinaw ni Ma. Rosario “Jinky” Pangilinan, 42, canteen owner, ng Block 7, Lot 4, Saint Catherine Village, Paranaque City, hindi siya dinukot kundi hindi lamang sila nagkaunawaan ng kanyang mister dahil sa selos.

Bunsod nito, kakasuhan na lamang ang suspek na si Mel Pangilinan ng paglabag sa Republic Act 9262 (Violence againts Women and Children).

Sa report ni Chief Inspector Angelito De Juan, dakong 9 p.m. nang matagpuan ang biktima kasama ang anak niyang 14-anyos binatilyo sa loob ng Sogo Hotel sa Brgy. Alabang, Muntinlupa City, nang pinagsanib na pwersa ng Muntinlupa City Police at Pasay City Police.

Pagdating ng mga awtoridad ay wala na ang suspek at ang naabutan na lamang nila ay ang biktima at ang anak na binatilyo.

Unang napaulat na dinukot ang biktima ng mister niyang si Mel noong Miyerkoles ng gabi sa Blue Wave Complex, Macapagal  Boulevard.

(JAJA GARCIA)