70-anyos ina pinugutan ng adik na anak

BACOLOD CITY – Pinugutan ang 70-anyos ina ng kanyang adik na anak sa lungsod ng Bacolod kahapon.

Kinilala ang biktimang si Eledina Gabitanan, habang ang suspek ay isang Percival Gabitanan, 34, kapwa residente ng Villa Esperanza, Brgy. Tangub, Bacolod City.

Sa imbestigasyon ni Insp. Richard Pajarito, police deputy chief ng Bacolod Police Station 8, nangyari ang insidente dakong 2 a.m. kahapon.

Aniya, nakarinig ang mga kapitbahay ng biktima na humihingi ng saklolo ang matanda kaya tumawag sila ng mga barangay tanod na siyang nagsumbong sa pulisya kaugnay sa insidente.

Sa pagresponde ng mga pulis ay bumulaga sa kanila ang pugot na ulo ng biktima sa loob ng bahay.

Habang nasa labas sa likurang bahagi ng bahay nakita ang katawan ng biktima.

Agad nahuli ng mga awtoridad ang salarin.

Sa panayam, sinabi ng suspek na aswang ang tingin niya sa kanyang ina kaya hinampas niya ng kawayan at tinaga sa leeg.

Ang pagiging drug addict ng suspek ang tinitingnang dahilan ng pulisya sa naturang krimen.