Loveteam nina Vice at Karylle, kinabog ang KathNiel at DongYan

ni Danny Vibas

IBANG klase na talaga ang fans ngayon. Para pala sa kanila, okey na okey ang love team nina Vice Ganda at Karylle na sa It’s Showtime lang naman ng ABS-CBN nag-e-exist and nowhere else. At isang joke lang naman ang love team na ‘yon.

Pero, hayun, pinanalo ng fans ang love team-love team-an na ‘yon bilang Love Team of the Year sa Yahoo Celebrity Awards na idinaos noong Biyernes ng gabi sa The Arena sa Mall of Asia. Tinalo ng joke only na love team na ‘yon ang kina Marian Rivera-Dingdong Dantes, Kathryn Bernardo-Daniel Padilla, Kim Chiu-Xian Lim.

Noong tinanggap nila ang award, si Vice nga mismo ay nagsabing hindi n’ya maintindihan kung anong gustong palabasin ng fans sa pagboto sa kanila. Matatandaang nagkairingan pa ‘yung dalawa noon sa pagpapa-loveteam sa kanila. Nainis nga raw kasi ang noon ay boyfriend pa lang ni Karylle na si Yael Yuson, ang miyembro ng Sponge Cola band.

Dahil siguro ayaw na ni Vice na magkaroon sila ni Karylle uli ng iringan, hindi n’ya pinatulan ang pangangantyaw nina Robie Domingo at Maxene Magalona, hosts ng awards, na mag-kiss sila. Ni mag-beso on stage, hindi ginawa nina Vice at Karylle.

Next year kaya ay si BB Gandanghari (formerly known as Rustom Padilla, ex-husband of Carmina Villaroel) naman ang may joke only na ka-love team na babae? Si Carmina kaya ‘yon? Papanalunin din kaya sila ng fans sa Yahoo Celebrity Awards?

Abangan!