Hardinero nahulog mula rooftop tigok (Nagpuputol ng puno)

NAMATAY ang isang 58-anyos hardinero nang mahulog mula sa rooftop ng gusali ng United Methodist Mission House habang nagtatabas ng sanga ng punong Mangga sa Malate, Maynila, kamakalawa.

Idineklarang patay ilang oras matapos dalhin sa Ospital ng Maynila (OSMA), ang biktimang si Ruben Beraquit, laborer, ng Blk.31, Lot. 38, Phase 3, Southville I, Marinig, Cabuyao, Laguna.

Sa imbestigasyon ni PO3 Marlon San Pedro ng Manila Police District – Homicide Section, dakong 9:30 a.m. nang mahulog mula sa rooftop ng gusali ang biktima.

Nabatid na malakas ang hangin nang oras na iyon pero nagpilit pa rin umakyat sa rooftop ng Mission House sa 1846 J. Bocobo St., ang biktima kasama ang isa pa para putolin ang mga sanga na humahampas sa gusali.

Dahil basa ang tinutungtungan at malakas ang hangin nadulas ang biktima hanggang tuluyang nalaglag at tumama ang ulo sa baldosa.

(LEONARD BASILIO)