2 coed todas, 1 pa kritikal (Motorbike sumemplang)

PATAY ang dalawang estudyanteng sina Sheranebeth Ocampo at Jane Margarita Lastrolio ng National Teachers College, habang kritikal ang isa pa nilang kasama nang sumalpok sa Ayala Bridge, Ermita, Maynila ang sinasakyan nilang motorsiklo kamakalawa ng gabi. (ALEX MENDOZA)

TODAS ang dalawang coed habang kritikal ang isa pa nang sumemplang ang sinasakyang motorsiklo sa San Miguel, Maynila, kamakalawa.

Matinding pinsala sa katawan at pagkabagok ng ulo ang naging sanhi ng kamatayan ng mga biktimang sina Sheranebeth Ocampo, 20, estudyante, ng Philippine College of Health and Sciences Inc., ng 263 Area-H Parola Compound, Tondo; at Jenee Anne Lingal, 20, estudyante ng National Teachers College at residente ng 356 P. Casal St., Quiapo, Maynila.

Bali ang buto ng biktimang si Jane Margarita Lastrollo, 21, estudyante ng National Teachers College, ng 165 Santolan Road, West Crame, San Juan City, na isinugod sa Philippine General Hospital (PGH).

Ayon kay SPO1 Bert Francisco, ng Manila Police District – Traffic Investigation Section (MPD-TIS) , dakong 11:00 a.m. nang maganap ang insidente sa Ayala Bridge, sakop ng San Miguel.

Minamaneho ni Ocampo ang Kawasaki motorcycle na may plakang 6066-HZ habang angkas sina Lingal at Lastrollo, nang pagbaba sa tulay ay dumeretso sa bangketa at nawalan ng balance saka sumemplang.

Sa imbestigasyon, nalaman na pawang nakainom ng alak ang mga biktima at walang suot na helmet.

(LEONARD BASILLIO/ may kasamang ulat ni John Bryan Ulanday)