HATAW! D'yaryo ng Bayan hatawtabloid.com
KAPWA tumimbuwang na walang buhay ang dalawang hinihinalang mga miyembro ng akyat-bahay gang nang pagbabarilin ng hindi nakilalang mga lalaki makaraan umatake sa isang bahay sa Caloocan City kamakalawa ng gabi.
Agad binawian ng buhay ang mga biktimang sina Roldan Polinio, 28, at Edgardo Viray, alyas Oyi, 36, kapwa residente ng Phase 8A, Package 11, Block 11, Excess Lot, Brgy. 171 ng nasabing lungsod.
Batay sa ulat ni SPO2 Constantino Guererro, 11:30 p.m. kamakalawa nang pagbabarilin ang dalawang biktima sa isang madilim na eskinita sa Phase 8, Block 25 Lot, Brgy. 176, Bagong Silang.
Nabatid na isang bahay sa lugar ang inakyat ng dalawa ngunit nakatunog ang mga resi-dente kaya nagpasyang tumakas na lamang.
Ngunit pagkaraan ay narinig ang sunod-sunod na putok ng baril at tumambad ang duguang katawan ng mga biktima.
Ayon kay Purok Leader Antonio Pepito, si Polinio ay kilalang miyembro ng akyat-bahay gang, habang si Viray ang tagabenta ng mga nakukulimbat sa kanilang mga biktima.
Pinaniniwalaang isang vi-gilante group ang pumatay sa mga biktima.
(ROMMEL SALES)
