HATAW! D'yaryo ng Bayan hatawtabloid.com
IDINAGDAG si Paul George ng Indiana Pacers sa mga superstars ng NBA na lalaban sa Gilas Pilipinas sa “The Last Home Stand” na gagawin sa Hulyo 22 at 23 sa Smart Araneta Coliseum.
Ito’y kinompirma ng pangulo ng Samahang Basketbol ng Pilipinas at ang tserman ng PLDT na si Manny V. Pangilinan sa kanyang Twitter account kahapon.
Makakasama ni George ang iba pang mga superstars ng NBA tulad nina Blake Griffin, Damian Lillard, Kawhi Leonard, Paul Pierce, DeMar DeRozan, Kyle Lowry at Nick Johnson.
Bumisita na si George sa Pilipinas noong isang taon nang isinama niya ang Pacers sa pre-season na laro kontra Houston Rockets.
Ang mga laro ng mga NBA All-Stars kontra Gilas ay bahagi ng paghahanda ng national team para sa FIBA World Cup sa Espanya sa Agosto.
Magkakaroon din ng slam dunk exhibition sina Griffin, DeRozan at Japeth Aguilar ng Gilas samantalang lalaban ang team captain ng Gilas na si Jimmy Alapag sa three-point shootout kontra kina Lillard at Lowry.
Bumisita na si DeRozan sa Pilipinas kamakailan bilang espesyal na panauhin ng NBA 3×3 Philippines.
(James Ty III)
