HATAW! D'yaryo ng Bayan hatawtabloid.com
PATAY ang isang 27-anyos overseas Filipino worker (OFW) habang malubhang nasugatan ang apat niyang katropa kabilang ang nakababatang kapatid makaraan paulanan ng bala ng hindi nakilalang suspek ang masayang despedida party sa Caloocan City, kamakalawa ng umaga .
Hindi na umabot nang buhay sa Bernardino Hospital si Greggy Tibang, ng #255 Area D., Sitio Diwa, Brgy. 178, Camarin ng nasabing lungsod.
Habang ginagamot sa Dr. Jose N. Rodriguez Hospital sina Celso Morella, 38, at Jeasam Almencion, 22; at sa East Avenue Medical Center (EAMC) sina Edmund Celestra, 27, at John Carlo Tibang, 23, nakababatang kapatid ni Greggy, pawang ng nabanggit na lugar.
Mabilis na tumakas ang hindi nakilalang suspek bitbit ang ginamit na baril.
Sa ulat ni PO2 Chilbert Ofalla, dakong 5:00 a.m. kamakalawa nang maganap ang pamamaril sa Malvar St., Brgy. 178 ng nasabing lungsod.
Dumayo ng inoman sa kanyang mga kaibigan ang biktima kasama ang nakababata niyang kapatid nang makantiyawan na magpa-despidida dahil muling aalis si Greggy patungo sa ibang bansa.
Inumaga ang inoman ng grupo hanggang sumulpot ang hindi nakilalang suspek at walang habas na pinaulanan ng bala ang mga biktima.
Patuloy pang inaalam ng mga awtoridad kung ano ang motibo sa nasabing insidente at kung sino ang salarin.
(ROMMEL SALES)
