Marami ang mapipili sa expansion pool

MATAPOS ang Grand Slam party ng San Mig Coffee na ginanap sa tanggapan ng San Miguel Corporation noong Biyernes ay humupa kahit na paano ang saya sa dibdib ng apat na manlalarong kabilang sa mixers.

Kasi’y nailaglag sila sa unprotected list upang mapagpilian ng dalawang expansion clubs – Kia at Blackwater srts.

Inilagay ng San Mig Coffee sa expansion pool sina Ronnie Matias, JR Cawaling, Lester Alvarez at Ken Bono.

Well, sa apat na players na ito, si Matias ay kabilang sa active list ng koponan sa nakaraang Governors Cup.

Ang tatlong iba ay nasa reserve list at pawang mga practice players na lang ng San Mig Coffee. Pero pinasalamatan sila ni coach Tim Cone na nagsabing malaki ang naging kontribusyon nila sa tagumpay ng koponan dahil sa sila ang talagang bumabangga sa mga stars sa ensayo.

Welll, sakaling mapili sila ng Kia o Blackwater ay makakaganda naman iyon sa kanilang career.

Kasi hindi na sila magiging reserves. Magagamit na sila sa susunod na season.

Tiyak namang mapapakinabangan sila, e.

Kung sakaling hindi naman sila mapipili, ginarantiyahan naman sila ni Rene Pardo na makakabalik sila sa kampo ng San Mig Coffee. Pero siyempre, bilang mga reserang muli o practice players.

Kasi’y malamang na magdadagdag ng players ang Mixers sa pamamagitan ng Rookie Draft. Lalong ninipis ang tsansang mailagay sila sa active list.

So, malamang na nagdarasal ang mga nailaglag sa expansion pool na sana ay mapili sila upang makapaglaro naman.

Sabrina Pascua