Expansion draft ng PBA inaantabayanan

KOMPIYANSA ang dalawang expansion teams ng PBA na Blackwater Sports at Kia Motors na magiging produktibo ang kanilang pagsali sa expansion draft ng liga na gagawin sa Hulyo 18 sa opisina ng PBA sa Libis, Quezon City.

Inilabas noong Biyernes ni PBA Commissioner Chito Salud ang kumpletong listahan ng mga manlalarong kasama sa expansion draft na hindi protektado ng kani-kanilang mga koponan.

Kasama sa listahan sina Danny Ildefonso at Paul Artadi ng Meralco, Bonbon Custodio at Jason Deutchmann ng Barako Bull, Ronnie Matias ng San Mig Coffee, Nick Belasco at Ryan Buenafe ng Alaska, Larry Rodriguez at Alex Nuyles ng Rain or Shine, Jojo Duncil ng San Miguel Beer, Jai Reyes ng Talk n Text, Wynne Arboleda at Mike Burtscher ng Air21 (na nabili ng NLEX), Jens Knuttel ng Ginebra at Val Acuna ng Globalport.

Bukod dito, may ilang mga beterano ng PBA na free agents tulad nina Kerby Raymundo, Rich Alvarez, Don Allado, Renren Ritualo, Reil Cervantes, Gilbert Bulawan, Allan Mangahas at Roger Yap.

Huling nagkaroon ang PBA ng dispersal draft noong 2000 nang pumasok ang Red Bull sa liga ngunit tanging sina Edmund Reyes, Ato Agustin at Glenn Capacio lang ang nakuha ng mga Barako dahil direkta nilang isinama ang mga manlalaro nila sa PBL noon sa pangunguna ni Raymundo.

(James Ty III)