PNoy may ibubunyag sa isyu ng DAP (Matapos tanggihan ang resignasyon ni Abad)

MAY ihahayag si Pangulong Benigno Aquino III bukas hinggil sa kontrobersiyal na Disbursement Acceleration Program (DAP) na idinelara ng Korte Suprema na unconstitutional ang ilang probisyon.

“ On Monday mukhang may ibang…We can probably expect a few more — may mga public engagement din po yata ang Pangulo at siguro iyong…We’ll hear more from the President perhaps in the coming Monday,” ayon kay Deputy Presidential Spokesperson Abigail Valte.

Ihahayag ng Pangulo na isasahimpapawid sa  pambansang telebisyon ang kanyang President’s National Address sa Lunes, ganap na 6:00 p.m. at inaasahang nakasentro ito sa kontrobersyal na Disbursement Acceleration Program (DAP).

Hiniling ni Communications Secretary Herminio Coloma, Jr., sa mga kasapi ng Kapisanan ng mga Brodkaster ng Pilipinas (KBP) na iere ang talumpati ng Pangulo sa kani-kanilang himpilan ng radio at telebisyon.

Tiniyak din ni Valte na nakahandang humarap si Budget Secretary Florencio Abad sa isasagawang imbestigasyon ng Senado hinggil sa DAP at kahit wala raw ang Senate probe ay isasapubliko din ng Palasyo ang listahan ng 116 DAP-funded projects kapag nakompleto na ang mga dokumento.

Binigyang-diin ni Valte na buo pa rin ang tiwala ng Pangulo kay Abad at humirit pa na huwag nang bigyan pa ng kulay ang pagbasura ng Punong Ehekutibo sa pagbibitiw ng Budget secretary kamakalawa.

“Tingin ko huwag na natin dagdagan pa ng ibang dahilan kasi malinaw iyong naging dahilan ng Pangulo e. Hindi ba maikli iyong naging pahayag niya pero malinaw so huwag na nating subukan pang dagdagan para lang magkaroon  ng pag-uusapan. Kumbaga, I think to everyone else, the President made his statement very clear, that was very precise, so huwag na natin pang lagyan ng iba pang dahilan kung saan wala namang iba pang dahilan,” aniya.

ni ROSE NOVENARIO