Ellen, pinormahan din ni Sen. Bong?

ni Roldan Castro
 

MARIING itinanggi at binawi ni Ellen Adarna ang isyung niligawan siya ni Senator Bong Revilla nang dalawin siya sa  set ng Moon of Desire para sa announcement na extended ang nasabing teleserye na tampok din sina Meg Imperial at JC De Vera.

“Hindi siya nanligaw! Walang ligaw na naganap. Nag-text lang! Once! ‘Yun lang ‘yon. But nothing, ‘Can we meet up somewhere?’ Walang ganoon,” paliwanag niya.

Nagkatrabaho kasi sila rati sa Si Agimat at Enteng at humantong sa text. Nagkakabiruan lang daw dati.

“Weh?’ Ginaganoon ko lang siya. Parang binabara ko lang siya minsan. And then when he texted me… I forgot, eh. I forgot the message. Once lang ‘yon, and then it never happened again,” aniya pa.

Friendly text lang daw ‘yun. Binawi na niya ang pahayag niya noon na nagpapadala ng “hi-hello” text messages si Senator Bong na parang nagpapahiwatig na gusto siyang pormahan noon. Ang naturang interview ay lumabas sa podcast ng 40 Forbidden Questions With Ellen ni DJ Mo Twister noong September 2013. Sey na lang ni Ellen nakainom daw siya ng alak kaya kung ano-ano na ang nasasabi niya that time.

“Nothing weird,” dagdag pa niya.

May balak ba siyang dalawin sa kulungan si Senator Bong? Ano ang masasabi niya sa pinagdaraanan ng actor-politician.

“Hindi kami ganoon ka-close! I don’t know, but… Ewan ko. I don’t want to say anything about that. Marami na ano… Maraming matatamaan,” bulalas pa niya sabay tawa.

Talbog!