Gigi Reyes isinugod sa ospital (Inatake ng anxiety nang ikulong sa BJMP)

ISINUGOD sa Taguig-Pateros District Hospital si Atty. Gigi Reyes dahil sa anxiety attack kahapon ng madaling araw.

Dakong 1:05 a.m. nang isugod sa pagamutan si Reyes ilang oras pa lamang nananatili nang ilipat sa Camp Bagong Diwa, Bicutan ng naturang lungsod kamakalawa ng gabi.

Sa press briefing na isinagawa ni Dr. Prudencio Sta. Lucia, medical director ng Taguig-Pateros District Hospital, sinabi niyang lumabas sa pagsusuri kay Reyes na dumanas siya ng anxiety disorder.

Nang isugod aniya sa pagamutan si Reyes ay mataas ang kanyang blood pressure sa170/110, naghihina kaya binuhat para isakay sa ambulansiya.

Sinabi ni Sta. Lucia, maayos na ang kalagayan ni Reyes at bumaba na ang blood pressure sa 130/90 dahil sa binigay nilang medikasyon bagama’t patuloy pang naka-dextrose.

Ayon sa doktor, kailangan pang obserbahan at hindi agad makalalabas si Reyes sa ospital.

Nabatid din na may history si Reyes na bell’s palsy and seizure attack.

(JAJA GARCIA)