Dalagita patay sa ka-eyeball na gadget buyer (Nag-post sa Sulit.com, 2 buwan nawala)

SA punerarya na sa Caloocan City natagpuan ang 19-anyos dalagita makaraan ang dalawang buwan nang magpaalam sa ina upang makipagkita sa customer na bibili ng gadgets na ini-post niya sa Sulit.com.

Kinilala ang biktimang si Angelie Bernardo, ng Brgy. Coloong, Valenzuela City, pinaniniwalaang ginahasa muna bago pinatay ng hindi nakilalang suspek na customer ng dalagita sa ibinibentang gadgets.

Salaysay ng ina ng biktima na si Maribel Timbal, dalawang buwan na ang nakalilipas nang magpaalam sa kanya ang anak upang makipagkita sa isang customer tungkol sa gadgets na ibinibenta gamit ang social networking site na Sulit.com.

Mula noon ay hindi na nagparamdam ang biktima dahilan upang ipagbigay-alam sa pulisya ang pagkawala ngunit natagpuan ng mga kaanak sa Jade Funeral Homes sa Camarin, Caloocan City

Sa ulat ng pulisya, natagpuan ang nakahubad na bangkay ng biktima sa isang madamong lugar sa Brgy. 171, Camarin noon pang Mayo 18 at dinala sa nasabing punerarya dahil walang mapagka-kakilanlan hanggang matagpuan ng kanyang mga kaanak.

Hinala ng mga awtoridad, hinalay muna ang biktima bago pinatay at itinapon sa nasabing lugar upang iligaw ang imbestigasyon.

ni ROMMEL SALES