Sanggol pinugutan ng baliw na ama (Ina sugatan, Suspek utas sa parak)

CAGAYAN DE ORO CITY – Patay ang isang buwan gulang na sanggol makaraan tagain ng sariling ama sa Brgy. I.S. Cruz, Jasaan, Misamis Oriental kamakalawa..

Napag-alaman, halos humiwalay ang ulo ng sanggol na si Ian James makaraan tagain ng ama na si Isidro Labadan na may karamdaman sa pag-iisip.

Inihayag ni Senior Insp. Esperejun Viado, hepe ng Jasaan Police Station, tinangka ng ina ng biktima na si Ybone Labadan na pigilan ang suspek ngunit maging siya ay tinaga sa ulo.

Inihayag ng opisyal na kanilang nasalubong sa daan ang ina ng bata na duguan kaya agad nilang isinugod sa Jasaan District Hospital.

Tinangka ng pulisya na pasukuin ang suspek ngunit binaril niya ang mga pulis kaya napilitan silang mag-return fire dahilan upang tamaan sa mukha at agad binawian ng buhay.

Sa imbestigasyon ng pulisya, bago ang krimen ay madalas na nagwawala ang suspek at isinisigaw na hindi niya alam kung saan kukuha ng pera para sa pagpapaaral sa mga anak hanggang sa pagtatagain ang anak na si Ian James.

Nakuha sa crime scene ang itak na ginamit ng suspek sa pagtaga kanyang mag-ina at narekober din ng pulisya ang .38 caliber pistol at dalawang homemade shot guns.

ni BETH JULIAN