Lineup ng NLEX aayusin na ngayong Linggo

MAGPUPULONG sa Biyernes ang buong management team ng North Luzon Expressway (NLEX) tungkol sa koponang ibabandera nito sa darating na ika-40 season ng Philippine Basketball Association na magsisimula sa Oktubre.

Sa lingguhang forum ng Philippine Sportswriters Association (PSA) kahapon sa Shakey’s Malate, sinabi ng consultant ng NLEX na si Allan Gregorio na sa ngayon, tatlong manlalaro lang ang siguradong kukunin ng Road Warriors mula sa Air21 pagkatapos na bilhin nito ang prangkisa ng Express noong isang linggo.

Sa ngayon ay tumutulong si Gregorio sa pag-aayos ng lineup ng NLEX dahil sa kanyang pagiging consultant ng Air21 ngunit umaasa siya na makakasama siya sa management team ng Road Warriors dahil sa kanyang pagtulong sa kanila noong naglalaro pa sila sa PBA D League.

Hindi pa rin sigurado si Gregorio kung si Boyet Fernandez pa rin ang hahawak sa NLEX sa PBA dahil abala pa rin si Fernandez sa paghawak sa San Beda College sa NCAA.

“We will have to make coach Boyet choose between San Beda and NLEX,” dagdag ni Gregorio. “And we also hope to finalize negotiations with Asi (Taulava) soonest. Sana, we can arrange trades to get back our old players like Calvin Abueva and Chris Ellis, as well as the old Smart Gilas players pero mahirap iyon.”

(James Ty III)