HATAW! D'yaryo ng Bayan hatawtabloid.com
HALOS manghiram ng mukha sa aso ang isang buntis makaraan gawing punching bag ng selosong live-in partner na naapektohan ng tsismis ng kainoman sa Navotas City kamakalawa ng hapon.
Kinilala ang biktimang si Emelita Salilican, 35, ng 373 L. Santos St., Brgy. Tangos ng nasabing lungsod.
Agad naaresto ang suspek na si Marvin Demanzana, 42, mangingisda at nahaharap sa kasong less serious physical injuries at grave threats in relation to R.A. 9262, nakapiit sa detention cell ng Navotas Police.
Batay sa ulat ni SPO1 Belany Dizon ng Women and Children Protection Desk (WCPD) ng Navotas Police, dakong 5 p.m. nang maganap ang insidente sa loob ng bahay ng dalawa.
Nakikipag-inoman ang suspek nang itsismis ng isa sa mga katagay na may nanliligaw sa biktima at lumalandi, naging dahilan upang magalit ang lasing na si Demanzana.
Salaysay ng biktima, nagulat na lamang siya nang sumugod ang galit na galit na suspek at siya ay binugbog.
(ROMMEL SALES)
