Shows na katapat ng Walang Tulugan ni Kuya Germs, nawala nang lahat

ni ROMMEL PLACENTE

BUKOD sa pagiging co-host ng kanyang uncle na si German Moreno sa Walang Tulugan With The Master Showman na napapanood tuwing Sabado ng gabi sa GMA 7 ay resident host din si John Nite sa Resorts World sa mga event nito.

“Mayroon silang isang department na binubuhay which is Cash Binggo. Kasi alam mo naman ang Resorts World maraming ginagawa, ‘di ba? May New Performing Arts, mayroong mall. Pero ang baby nila ngayon ‘yung Cash Binggo. Ako ‘yung host doon. Medyo matatali ako roon kasi everyday ako roon from 3:00 to 5:30 in the afternoon. Plus kung may mga event sila then I get to host that too,” sabi ni John.

Eighteen years nang tumatakbo sa ere ang Walang Tulugan with the Master Showman. Ayon kay John hindi raw nila inaasahan na tatagal ng maraming taon sa ere ang kanilang show .

“Hindi namin napansin na nagising kami, 18 years na pala ‘yung ‘Walang Tulugan’. Nag-uusap nga kami ni kuya Germs, eh. Napapag-usapan namin ‘yung sinasabi sa amin noon na mahihirapan daw kaming tapatan ‘yung ganoong show, ‘yung ganyang show. Pero hindi naman sa pagmamayabang, lahat naman ng tinapatan namin nag-disappear ng lahat. Kami nandito pa rin,” buong pagmamalaki pang sabi ni John.