Libro inihagis ng titser sa ulo ng grade 5 pupil

BUTUAN CITY – Idinaraing ng 12-anyos na Grade 5 pupil ang maya’t mayang pagsakit ng kanyang ulo at pagsusuka nang masugatan ang kanyang kanang kilay na tinamaan sa inihagis na libro ng kanyang guro.

Kinilala ang guro na si Olivia Manilag, adviser ng biktimang itinago lamang sa pangalang Paul, sa Bobon Elementary School na sakop ng Department of Education (DepEd) Butuan City Division.

Inihayag ng biktimang si Paul, mula nang maganap ang insidente nitong Hulyo 1 ay hindi na siya pumasok pa sa klase dahil sa trauma at pagkahilo.

Ito’y sa kabila ng inihayag ng guro na hindi siya ang target sa inihagis na libro kundi ang kanyang mga kaklase sa kanyang likuran.

Nakatakdang isailalim ang biktima sa CT scan upang mabatid kung napinsala ang kanyang ulo.