HATAW! D'yaryo ng Bayan hatawtabloid.com
NADAKIP sa entrapment operation kahapon ng mga tauhan ng Taguig City Police ang isang 29-anyos ginang makaraan hingian ng pera at takutin ang isang titser na sinasabing may relasyon sa kanyang mister.
Ayon kay Chief Inspector Benito Basilio, Jr., hepe ng Station Investigation Detective & Management Section, dahil sa pakiusap ng suspek ay hindi nila inihayag ang tunay na pangalan ng ginang at itinago sa pangalang Marie, nakapiit sa kanilang detention cell at nahaharap sa kasong robbery extortion.
Hindi rin inihayag ang pangalan ng guro na itinago na lamang sa pangalan Beth, sa takot na matanggal sa trabaho at mawalan ng lisensiya bilang isang guro.
Sa imbestigasyon ng pulisya, natuklasan ni Marie na may relasyon ang gurong si Beth sa kanyang mister na hindi rin pinabanggit ang pangalan.
Imbes magharap ng reklamo si Marie laban kay Beth ay hiningian na lamang niya ng malaking halaga ang gurong si Beth kapalit ng pananahimik.
Dahil ayaw maeskandalo ng biktima sa pinapasukan niyang paaralan, pumayag siya sa nais ni Marie at ibinigay ang halagang hinihingi.
Ngunit muling humingi ng pera ang suspek dahilan para humingi ng tulong ang biktima sa himpilan ng pulisya.
Gayon man, nagbanta si Marie na hindi pa aniya tapos ang problema dahil babalikan niya ang kanyang mister at ang titser na sasampahan niya ng kasong adultery.
ni JAJA GARCIA
