HATAW! D'yaryo ng Bayan hatawtabloid.com
HINDI NAKONTENTO SA CP NUMBER NAG-SELFIE SI NICOLE KASAMA SI ATOY
“Wanna learn piano lessons for free?” ang kasunod na tanong niya sa akin.
“No” ulit ang sagot ko na ‘wala nang ela-elaborasyon dahil hindi ako nakapagbaon ng Ingles.”
“Am Nicole” ang pakilala niya sa akin, “ … and yours?”
Nakupuuu! Tuluyan nang nagkapili-pilipit ang dila ko. “I-I’m Fortinato b-but just call me Lucky as friends do…” sabi ko sa paglalahad ng palad sa kanya.
Parang naengkanto sa kanilang kinatatayuan sina Biboy, Arvee at Myke. Hindi makapaniwala ang mga kaklase ko sa Uste sa kanilang mga nasasaksihan.
Nakipagkamay sa akin si Nicole at saka dinukot sa bulsa ng kanyang pajama ang isang ballpen. Isinulat niya sa braso ko ang labing-isang numero. “My cp numbers,” aniyang nakatawa. Tapos, inilabas niya mula rin sa bulsa ng pang-ibabang kasuotan niya ang pinakabagong modelo ng isang mobile phone. “Can I have yours?” aniya sa akin. Dali-dali ko siyempreng ibinigay ang aking cp numbers na inilagay niya sa phonebook.
“You’re so cute, you know…” ngiti sa akin ni Super Sexy Lady.
Tumabi siya sa akin at saka ako isinama sa pagse-selfie niya. Nag-click nang nag-click ang hawak niyang cp. Parang bigla akong nawala sa sarili. Pakiwari ko’y lumilipad akong patungong langit. “Cute” daw ako. Pero tama ba ang narinig ko kanina na tinawag din niya akong “handsome guy?”
“Let’s dance, Lucky. C’mon…” sabi ni Super Sexy Nicole nang hilahin ako sa kamay at muling umindak-indak sa tempo ng “If I Fell” na kinanta ng grupong nagko-concert.
Sa tingin ko ay atat din na makilala at makadaupang-palad si Nicole nina Biboy, Arvee at Mykel. E, biglang pasok sa eksena ang dalawang malalaking lalaking naka-barong. Walang pakundangan akong isinalyang palayo kay Nicole. Kung mahina-hina ang mga tuhod ko ay baka napasubasob ako sa sementadong lupa. Pero hindi ako nakapalag. At lalong walang anomang naging aksiyon ang tatlo kong dabarkads na nabulaga. Pareho kasing may sukbit na baril sa baywang ang dalawang lalaki. Sopistikado ang communication gadget nila. Tulad iyon ng gamit ni Kevin Cosner sa napanood kong pelikulang “The Bodyguard” na pinagtambalan nila ni Witney Huston. (Itutuloy)
ni Rey Atalia
