Mag-utol na paslit, alagang aso patay sa karne ng pawikan (Tatay, 3 pa kritikal)

DALAWANG paslit na magkapatid ang hinihinalang nalason sa kinain na karne ng Pawikan sa Aroroy, Masbate.

Bukod sa dalawang paslit, nalason din ang ama ng mga namatay at dalawang kapatid pa na kumain din ng nasabing karne.

Sa ulat ng pulisya, binigyan umano ng kanilang kapitbahay ng karne ng pawikan ang mag-aama na kanilang inulam.

Pagkatapos makakain, nakaramdam na ng panghihina, pananakit ng tiyan, at pagsusuka ang dalawang namatay na sina Kimberly at Joel.

Isang oras pa ang makalipas, nanakit ang tiyan at nagsuka ang amang si Jose Bernales, at mga anak na sina Jella, Gerson at Jesebel.

Maging ang aso ng pamilya Bernales na nakakain din ng karne ng pawikan ay namatay.

150 KATUTUBO NALASON SA PACK LUNCH

HIGIT sa 150 mga katutubo mula sa walong sitio sa barangay Tablu, sa Tampakan, South Cotabato ang isinugod sa iba’t ibang pagamutan dahil sa food poisoning mula sa pack-lunch sa dinaluhang pulong.

Ayon kay Jimmy Baret, tribal leader ng B’laan community sa Sitio Kolondatal, bukod sa kinompirmang 120 katao na ginagamot sa South Cotabato Provincial Hospital at iba pang ospital na karamihan ay mga bata at matatanda patuloy pang nadaragdagan ang bilang ng mga dinadala rito.

Ayon kay Dr. Conrado Braña, hospital director, nakararanas ng pananakit ng tiyan, pagsusuka, at pagkahilo ang mga pasyente.

Napag-alaman kay Cecile Mancho, accounting clerk ng B’laan Foundation ng Barangay Tablu, nagpa-cater sila ng 200 pack lunch para sa idinaos na general assembly kaugnay sa Banlas project na dinaluhan ng mga tribal members mula sa Sitio Tucayman, Manisi, Batu, Crossing, Lagdik, Magga, Kolon Datal at Sitio Center ng Barangay Tablu.

Naglalaman ng pritong manok, itlog at kanin ang pack lunch na ipinamigay sa mga biktima na ngayon ay sinusuri na ng BFAD.

(Beth Julian)