HATAW! D'yaryo ng Bayan hatawtabloid.com
KAPWA nalagutan ng hininga ang mag-asawa nang pagsasaksakin ng fish vendor nang magtalo kaugnay sa mahal na presyo ng isda kamakalawa sa bayan ng Castilla sa lalawigan ng Sorsogon.
Namatay habang ginagamot sa Vicente Peralta Memorial Hospital ang mga biktimang sina Romeo at Wilma Legazpi, residente ng Brgy. Macalaya ng nabatid na bayan.
Samantala, nadakip sa follow-up operation ng pulisya ang suspek na si Edgar Magdaong, 44, residente rin ng bayan.
Sa impormasyon mula sa Police Regional Office (PRO) 5 sa Camp Simeon Ola, naganap ang insidente 10 a.m. sa palengke ng bayan.
Sinasabing nagtanong ang mga mag-asawa hinggil sa presyo ng panindang isda ng suspek pero namahalan sa presyo nito.
Kinuwestiyon ng dalawa kung bakit napakamahal ng mga isda ng suspek na humantong sa pagtatalo.
Habang nagtatalo, kinuha ng suspek ang kutsilyo saka binurdahan ng saksak ang mag-asawa.
(JETHRO SINOCRUZ)
