HATAW! D'yaryo ng Bayan hatawtabloid.com
KAPWA nasa malubhang kalagayan sa pagamutan ng dalawang obrero makaraan pagbabarilin ng isang kalugar na hinahanap ang nawawalang anak sa Malabon City kamakalawa ng gabi.
Ginagamot sa Tondo Medical Center ang mga biktimang sina Sonny Ramos, 45, tinamaan ng bala sa tiyan, at Wilfredo Dela Cruz, 42, tinamaan ng bala sa balakang, kapwa residente ng 34 Merville Subd,. Brgy. Dampalit ng nasabing lungsod.
Habang pinaghahanap ang suspek na kinilalang si Joel Ofgueria, nasa hustong gulang, ng Peoples Village, Merville Subd. ng nasabing barangay, mabilis na tumakas makaraan ang insidente.
Sa ulat ni PO3 Jun Belbes, dakong 10:10 p.m nang maganap ang insidente sa tapat ng bahay ng mga biktima sa nasabing lugar.
Nag-iinoman ang mga biktima nang dumating ang suspek na galit na galit at hinahanap ang kanyang anak na isang Jim ngunit hindi niya natagpuan.
Kinantiyawan ng mga biktima ang suspek na huwag nang hanapin ang anak dahil binata na ngunit ikinagalit ni Ofgueria.
Umalis ang suspek ngunit nang bumalik ay armado na ng baril at walang sabi-sabing pinagbabaril ang mga biktima.
(ROMMEL SALES)
