‘Panday’ nasindak sa daga

BUKOD sa matinding init sa loob ng selda, inireklamo rin ni Senador Ramon “Bong” Revilla Jr. ang nagkalat na mga ipis at daga na aniya’y sinlaki ng pusa.

Si Revilla ay nakapiit sa PNP Custodial Center makaraan sumuko nitong Biyernes sa Sandiganbayan bunsod ng kasong graft at plunder kaugnay P10-billion pork barrel scam.

Kaugnay nito, hiniling ng pamilya Revilla na pahintulutan silang dalawin ang senador araw-araw.

Sa kasalukuyan, ang mga Revilla ay pinapayagan lamang dumalaw tuwing Huwebes at Linggo dakong 9 a.m. hanggang 3 p.m.

Nitong Linggo, nagdala ang pamilya Revilla ng pagkain at bible sa selda ng senador.

Marami rin mga kaibigan ni Revilla ang dumalaw, gayon din ang ama ng senador na si dating Senador Ramon Revilla, Sr.

LUXURY CELL OK SA CHR

WALANG nakitang mali si Commission on Human Rights (CHR) Chairperson Loretta Ann “Etta” Rosales sa treatment ng pagkulong kay Sen. Bong Revilla, Jr., sa PNP Custodial Center sa Camp Crame.

Sinabi ni Rosales, nasunod ang tamang proseso ng pag-aresto at pagkulong sa senador.

Aniya, kung maayos ang detention facility ni Sen. Revilla ay nararapat ito dahil dapat mabigyan ng disenteng kulungan ang mga bilanggo sa bansa.

Binigyang-diin lamang ng CHR chief na kung nabigyan nang maayos na detention cell si Revilla at ang iba pang senador na susunod na makukulong dapat lahat ng bilanggo ay nasa maayos na detention cell din.

Sinabi ni Rosales, dapat nang baguhin ang pag-iisip na may special treatment na ibinibigay kung nasa magandang facility ang isang bilanggo, dahil ito ang nararapat para sa kanila upang hindi malabag ang kanilang karapatang pantao.

Kaugnay nito, hinikayat ni Rosales ang pamahalaan na ayusin at bigyan ng disenteng detention facilities ang lahat ng bilanggo sa buong bansa at tinutulan ang panukalang gumawa ng hiwalay na kulungan para sa mga akusado sa high profile cases.

hataw News Team