HATAW! D'yaryo ng Bayan hatawtabloid.com
PATAY ang isang tatay makaraan tumalon mula sa tumatakbong bus sa bayan ng Del Gallego, Naga City kamakalawa habang binawian din ng buhay ang isang babaeng dating overseas Filipino worker (OFWs) nang tumalon mula sa isang tulay sa Cauayan, Isabela.
Kinilala ang biktimang tumalon sa bus na si si Eulogio Ramos, 52-anyos.
Sa ulat ng Camarines Sur Police Provincial Office, binabaybay ng Apple City bus ang kahabaan ng Brgy. Pasay sa naturang bayan patungong Maynila nang biglang tumalon si Ramos.
Nakaupo ang biktima sa ikatlong hanay ng mga upuan ng bus ngunit biglang tumayo at tumalon mula sa sasakyan.
Agad huminto ang driver ng bus na si Nelson Gonowon at sinaklolohan ang biktima.
Isinugod si Ramos Ragay District Hospital ngunit idineklarang dead on arrival.
Blanko pa ang pulisya kung ano ang nagtulak sa biktima upang magpatiwakal.
Samantala, nagkalasog-lasog ang katawan ng isang dating OFW makaraan tumalon sa tulay ng Palattao sa Naguilian, Isabela.
Ang biktimang si Jenelyn Natividad ng Sunlife, Naguilian, isang dating OFW ay tumalon mula sa Naguilian Bridge, isa sa mga pinakamahabang tulay sa Isabela at tinatayang 20 meters ang lalim mula sa taas ng tulay hanggang sa tubig.
Inihayag ng saksing si Eduardo Curameng ng Brgy. Palattao, naliligo siya kasama ng kanyang mga anak sa pampang ng ilog nang mapansin nila ang biktima na biglang tumalon at bumagsak sa pangatlong pundasyon ng tulay.
Habang inihayag ni Precy Natividad, bilas ni Jenelyn Natividad, bago ang insidente ay nagtungo sa kanilang bahay ang biktima at sinabing “Sabihin mo sa asawa ko na ako ang aako sa lahat ng nagawa niyang kasalanan.”
Sinasabing ang biktima ay nasiraan ng bait dahil sa pagmamalupit ng kanyang amo sa Middle East.
(BETH JULIAN)
