Jommel Lazaro pinaglaruan ang nakalaban

Pinaglaruan ng hineteng si Jommel Lazaro sakay ng kabayong si Whoelse ang kanilang mga nakalaban sa isang Handicap Race Group-03.

Sa largahan ay marahan na pina-ayre ni Jommel si Whoelse at hinayaan muna nila na magdikta ng harapan ang mga nasa tabing balya na sina Fleet Wood at Al Safirah. Subalit paglagpas ng unang kurbadahan ay kumukusa si Whoelse, kaya inilayag ng bahagya ni Jommel ang kanyang renda.

Pagpasok sa medya milya ay nakuha na nila ang unahan habang nilalaro-laro lamang ni Jommel. Pagsungaw ng rektahan ay biglaang dumating sa eksena ang rumemateng si Niagara Boogie, pero hindi iyon naging balakid kay Jommel at tinapos niya ang laban ng walang lingunan sa mga kalaban.

Naorasan ang takbuhan na iyan ng 1:38.2 (19′-25′-25′-28) para sa 1,500 meters na distansiya.

Fred L. Magno