Tawag ng mga reperi magiging patas — Cristobal

IPINANGAKO ng bagong basketball commissioner ng National Collegiate Athletic Association (NCAA) na si Arturo “Bai” Cristobal na magiging patas ang tawag ng mga reperi sa pagsisimula ng ika-90 season ng liga sa Hunyo 28 sa Mall of Asia Arena sa Pasay.

Papalitan ni Cristobal si Joe Lipa na naging komisyuner ng NCAA noong Season 89.

“I cannot promise perfect officiating. The only thing I can promise is fair play,” wika ni Cristobal sa press conference ng NCAA kahapon sa MOA Arena. “I want to ask your cooperation and understanding and let us work together as one with the organizers.”

Si Cristobal ay dating manlalaro ng Crispa, Shell at Presto sa PBA bago siya naging coach ng San Sebastian at Perpetual Help sa NCAA.

Naging miyembro rin siya ng technical committee ng liga noong isang taon.

“There will be no changes in the rules. If there will be, we will try to align them all with FIBA,” ani Cristobal.

Maghaharap ang defending champion San Beda College at ang host school na Jose Rizal University sa unang laro sa Hunyo 28 simula ala-una ng hapon pagkatapos ng opening ceremonies sa alas-12 ng tanghali.

Magbabanggaan naman ang Letran at San Sebastian sa ikalawang laro sa alas-tres.

“We Make History: Today’s Heroes, Tomorrow’s Legend” ang tema ng NCAA ngayong taong ito.

Mapapanood ang mga laro ng NCAA tuwing Lunes, Miyerkoles, Biyernes at Sabado sa TV5 at Aksyon TV 41.

(James Ty III)