HATAW! D'yaryo ng Bayan hatawtabloid.com
ARESTADO sa mga tauhan ng Manila Police District-Anti Carnapping Unit ang dalawang Korean national makaraan karnapin ang isang Hyundai Starex van sa Malate, Maynila.
Sinampahan ng kasong carnapping ng biktimang si Michelle Ann Nangit, 31, negosyante, tubong Nueva Ecija, at residente ng San Andres Bukid, Maynila, ang mga suspek na sina Jeong Eung Shik at Sin Juyoung, ng 1712 Palma Executive Village, BF Homes, Parañaque City.
Ayon kay S/Insp. Rommel Geneblazo, hepe ng MPD-Ancar, ang dalawang suspek ay nadakip dakong 8 p.m. kamakalawa sa harap ng Cherryville Hotel sa Remedios at Guerrero streets, Malate, Maynila
Iniulat na nawala ang naturang Starex van (BES 933) noong Abril 24 sa Cherryville Hotel habang nakaparada.
Agad nakipag-ugnayan sa MPD-Ancar ang biktima nang mamataan muli sa harap nang nabanggit na hotel ang sasakyan kamakalawa ng gabi.
Samantala, itinanggi ng dalawang Koreano na kinarnap nila ang sasakyan kundi hiniram lamang nila ito sa kaibigan nilang Filipino.
(LEONARD BASILIO)
