Laro ng PBA araw-araw na

SIMULA sa susunod na linggo ay gagawing araw-araw na ang mga laro ng PBA Governors’ Cup quarterfinals at semifinals.

Ayon sa iskedyul na inilabas ng PBA, magsisimula ang quarterfinals sa Hunyo 17, Martes, kung saan tig-dalawang laro ang gagawin hanggang sa matapos ang quarters.

Kung mananalo ang apat na koponang hawak ang twice-to-beat na bentahe sa quarters ay magsisimula ang semis sa Hunyo 19 at gagawing tig-isang laro ang semis araw-araw.

Pati sa Huwebes ay magkakaroon ng laro ang PBA quarters at semis para matapos ang Governors Cup sa Hulyo 9 at bigyan ng pagkakataon ang Gilas Pilipinas na makapag-ensayo nang matagal para sa FIBA World Cup sa Espanya sa Setyembre at Asian Games sa Incheon, Korea.

Sa ngayon ay tanging sa Huwebes ay walang laro ang PBA para maipalabas ng TV5 ang programang Kuwentong Gilas at Kuwentong PBA na mga dokyumentaryong produced ng Sports5 tungkol sa liga.

Napapanood ang nasabing programa tuwing Huwebes, 9:30 ng gabi pagkatapos ng mga pelikula ng TV5 na isinalin sa Tagalog.

(James Ty III)