Filipino subjects aalisin sa kolehiyo (Palasyo ‘nganga’ sa isyu)

NGANGA ang Malacañang sa desisyon ng Commission on Higher Education (CHED) na tanggalin na ang Filipino subjects sa kolehiyo at unibersidad.

“Puwede bang… Let me defer first. I don’t know the—kung ano ‘yung naging katwiran doon. Tatanungin muna namin si Chair Tati Licuanan kung totoong mayroon ganoong plano,” tugon ni Lacierda nang tanungin ng media kung suportado ng Palasyo ang naturang hakbang ng CHED.

Lumalaganap ang online petition na humihiling sa CHED at Kongreso na magsagawa ng hakbang upang isama sa bagong General Education Curriculum (GEC) sa kolehiyo ang mandatory na 9 yunit na Filipino subjects para sa lahat ng mag-aaral, ano man ang kurso.

Sinuportahan din ng National Commission for Culture and the Arts-National Committee on Language and Translation (NCCA-NCLT), sa pamamagitan ng isang resolusyon ang naturang online petition.

Inalis ng CHED ang lahat ng asignaturang Filipino sa antas tersiyarya sa pamamagitan ng CHED Memorandum (CMO) No. 20, Series of 2013 na may petsang 28 Hunyo 2013 na nagsasaad ng bagong GEC kaya maraming mabubuwag na Departamento ng Filipino sa mga kolehiyo at unibersidad sa buong bansa.

Ayon pa sa petisyon, mahigit 10,000 full-time at 20,000 part-time guro ng Filipino ang nakatakdang mawalan ng trabaho o mabawasan ng kita bunsod ng nasabing CMO.

(ROSE NOVENARIO)