Doktora pinaslang sa N. Ecija (Bangkay hubong natagpuan sa kanal ng patubig)

PATAY na nang matagpuan lumulutang sa isang irigasyon sa Science City of Muñoz sa lalawigan ng Nueva Ecija ang 58-anyos lady physician makaraan umalis ng kanilang bahay sa Bocaue, Bulacan upang magtrabaho sa isang ospital sa nabanggit na unang lalawigan.

Kinilala ng pulisya ang biktimang si Carolina Talens, isang ObGynecologist ng Gallego City General Hospital sa nasabing lungsod at residente ng isang barangay sa bayan ng Bocaue, Bulacan.

Sa inisyal na ulat ng pulisya, huling nakitang buhay ang biktima dakong 8 a.m. kamakalawa sakay ng kanyang Isuzu Sportivo (ZJD-124) ngunit natagpuan kinabukasan ang katawan na lumulutang sa Casecnan Irrigation Canal na nakasuot na lamang ng bra at panty.

Hindi pa matukoy ng pulisya ang sanhi ng pagkamatay ni Talens ngunit hinala ang mga awtoridad, maaaring biktima ng carnapping ang doktokra nang matuklasang nawawala ang kanyang sasakyan.

ni DAISY MEDINA