3 Maria itinumba sa Vizcaya

CAUAYAN CITY, Isabela – Hindi pa makilala ang bangkay ng tatlong babaeng natagpuan patay dakong 5 a.m. kahapon malapit sa pampang ng ilog sa Purok 6, Indiana, Bambang sa Nueva Vizcaya.

Ayon sa Nueva Vizcaya Police Provincial Office (NVPPO), ang mga bangkay ng pinaniniwalaang mga biktima ng summary execution ay natagpuan ng magsasakang si Juanito Laciapag na residente sa lugar.

Sa imbestigasyon ng Bambang Police Station, inihayag ng residente sa lugar na si Lerma Dizon, dakong 2 a.m. ay may narinig siyang mga putok ng baril ngunit hindi niya ito pinansin.

Ang tatlong bangkay ng babae, may gulang 30-anyos hanggang 40-anyos, ay pawang may mga tama ng bala sa katawan.

Patuloy ang imbestigasyon ng mga awtoridad para makilala ang mga biktima at malaman kung ano ang motibo sa pagpaslang sa kanila.