HATAW! D'yaryo ng Bayan hatawtabloid.com
PINALITAN na ng Barako Bull ang import na si Eric Wise at nandito na sa bansa ang kanyang kapalit upang maisalba ang Energy Colas sa PBA Governors Cup.
Kinuha ng Barako si Allen Durham, isang 6-5 na forward mula sa Grace Bible College at kagagaling lang mula sa CS Dinamo Bucuresti, isang komersiyal na koponan mula sa Romania.
Si Durham ay dapat sanang import ng Air21 ngayong torneo ngunit dahil sa kanyang kontrata sa Romania ay si Dominique Sutton na lang ang kinuha.
Nagdesisyon ang coaching staff na palitan si Wise dahil sa 1-5 na karta nito katabla ang Meralco at Globalport.
Sa huling laro ni Wise noong Martes ay nalimitahan siya sa 16 puntos nang natalo ang Barako kontra Barangay Ginebra San Miguel, 98-70.
Sasabak na si Durham, kasama ang dalawang baguhang sina Nico Salva at Bonbon Custodio mula sa Globalport, para sa Barako kontra Batang Pier mamaya sa Alonte Sports Arena sa Binan, Laguna.
(James Ty III)
