Cebu mayor, 7 opisyal, 12 taon kulong sa graft

CEBU CITY – Hinatulan ng 12 taon pagkabilanggo ng Sandiganbayan ang isang alkalde ng Aloguinsan Cebu at pito pang opisyal makaraan napatunayan sa paglabag ng Anti-Graft and Corrupt Practices Act dahil sa maanomalyang pagbili ng aluminum composites noong 2007.

Ang mga hinatulan ay sina Mayor Cynthia Moreno, municipal civil registrar, Bids and Awards Committee (BAC) chairman Pepito Manguilimotan; municipal budget officer at BAC vice chairman Nonel Villegas; municipal agricultural officer Marilyn Flordeliza; BAC member Gertrudes Ababon; municipal assessor John Lim; municipal engineer, pangulo ng technical working group Orven Nengasca, at BAC member Emilia Luz Celis.

Ayon kay Moreno, maghahain sila ng apela kaugnay sa inilabas na desisyon.

Iginiit ng mga hinatulan na politika ang motibo sa pagsampa ng kaso ni ex-Councilor Felimon Georsua.

Kaugnay nito, may 15 araw sina Moreno at kasamahan na maghain ng apela at maghain ng P30,000 itinakdang piyansa.

Kung maalala, sinampahan ng kaso ang alkalde at pito pang opisyal makaraan bumili ng aluminum composites na umabot sa P1,118,635 na hindi dumaan sa bidding.