HATAW! D'yaryo ng Bayan hatawtabloid.com
NATUKOY na ng Department of Justice (DoJ) kung sino ang sinasabing starlet na pinapasok sa hospital room ng convicted drug lord na si Ricardo Camata nang dalhin ang preso sa bahay pagamutan noong nakaraang buwan.
Ayon kay Justice Undersecretary Francisco Baraan III, si Krista Miller ang dumalaw kay Camata noong Mayo 31 sa Metropolitan Hospital sa Maynila.
Sinabi ni Baraan, sa kanyang pag-review sa CCTV footage ng ospital, “sapol na sapol” na ang starlet ang bumisita kay Camata.
Inamin na rin aniya ito ni Camata sa Bureau of Corrections.
Higit isang oras aniyang nanatili si Miller sa silid ng Sputnik Gang leader.
Kasama ni Miller ang dalawang lalaki na sinasabing dancer.
Noong Hunyo 1 bumalik ang dalawang lalaki sa silid ni Camata ngunit dalawang babae na ang kasama na hindi pa natutukoy kung sino.
Ayon kay Baraan, sa kanyang pag-review sa CCTV, masasabing walang sakit si Camata at malakas habang pa-text-text pa sa hallway ng ospital.
Hindi rin kinuha ang pangalan o idinaan sa inspeksyon ng mga gwardiya ang mga dumalaw kay Camata.
