Lola todas sa kapeng Indonesian

CAGAYAN DE ORO CITY – Patay ang isang 78-anyos lola makaraan uminom ng hindi rehistradong herbal drink na kumalat sa ilang bahagi ng Lungsod ng Cagayan de Oro.

Inahayag ng isang nagngangalang Jojie Aries mula sa Brgy. Macasandig ng siyudad, hindi nila inaasahan na ang Sehat Badan coffee na mula sa Indonesia ang magiging dahilan ng pagkamatay ng kanilang ina.

Aniya, mahigit isang taon na ring umiinom ng kape ang kanilang ina dahil sa iniindang rheumatic disorder.

Ayon kay Aries, epektibo ang nasabing kape sa karamdaman ng ina ngunit nang huminto na sa paggamit ay nagsimula rin ang komplikasyon. Batay sa medical findings ng doktor, dumanas ng cardiac arrest ang biktima na naging dahilan ng kanyang pagkamatay.

Kaugnay nito, agad naglabas ng advisory ang Food and Drug Administration (FDA) upang ialerto ang publiko laban sa nasabing produkto. Inihayag ni FDA Acting Director General Kenneth Hartigan-Go, batay sa inisyal nilang ebalwasyon, nalabag ng produkto ang Administrative Order 88-B of 1984 o walang English translation na mababasa ang publiko sa sachet nito.