HATAW! D'yaryo ng Bayan hatawtabloid.com
PATAY ang isang pulis habang dalawa ang sugatan sa anti-drug operation sa Brgy. Molino 3, Bacoor City, lalawigan ng Cavite kahapon ng umaga.
Kinilala ang namatay na pulis na si SPO3 Alejandro Ame, nakatalaga sa Quezon City Police District (QCPD).
Habang sugatan ang informant na si Alvin Martin at isa pang pulis na si PO1 Leonard Sayagadoro.
Nabatid na nagsasagawa ng surveillance ang mga biktima kasama ang PDEA agent na si Ramiro de Guzman, nang dalawang suspek na nakasakay sa motorsiklo at isang van ang huminto at sila ay pinagbabaril. Pagkaraan ay agad tumakas ang mga suspek.
(BETH JULIAN)
QC POLICE NA NAPATAY SA CAVITE AWOL — QCPD
Ipinahayag kahapon ng mataas na opisyal ng Quezon City Police District (QCPD), ang namatay na pulis sa nabigong anti-drug operation sa Cavite ay matagal nang AWOL (absent without leave) sa pinaglilingkuran niyang police station sa lungsod.
Ayon kay Supt. Norberto Babagay, hepe ng QCPD Station 4, si SPO3 Alejandre Ame ay itinalaga sa kanyang himpilan nitong Mayo 5 (2014), pero hindi pa niya kailanman nakikita sa kanyang opisina.
“Itinalaga siya sa ‘min galing Region 2 thru papers lang, pero mismong siya (SPO3 Ame) ay hindi ko nakikita sa opisina,” ani Supt. Babagay.
Dahil dito, dagdag ng opisyal, binigyan niya si Ame ng isang linggo para ayusin ang kanyang assign paper, pero nabigo dahilan para ilagay sa AWOL status.
Giit ni Supt. Babagay, sa isinagawang anti-drug operations na ginawa ni Ame sa Cavite, wala silang kinalaman at kung paano siya napunta sa ganoong operasyon.
“Gusto ko lang malaman nila, oo nga taga-QCPD si Ame, pero wala kaming alam na may lakad siyang ganoong operasyon,” paglilinaw ni Babagay. (Almar Danguilan)
