Nanalo na si Donaire

DESMAYADO ang mga karerista sa pagsasahimpapawid ng mga karera sa Santa Ana Park sa Naic, Cavite.

Nakansela kasi ang karera pagkatapos ng Race 7.

Ang dahilan daw ay  ”technical”.

Anak ng tipaklong.   Hindi mo maikakatwiran ang ganoon sa mga karerista lalo na dun sa mga adik talaga sa pananaya.

Ang tagal na nga namang nakabalik ang karera sa Santa Ana at hindi nila naayos ang posibleng mga problema sa kanilang operasyon.

Mukhang tutulog-tulog ang pamunuan ng Santa Ana?

Sa simula pa lang kasi ng telecast nila ng mga karera ay problema na ang audio sa mga gumagamit ng cable.  At nagtataka ang mga kareristang nanonood kung bakit patuloy sa pagsasalita ang mga announcer gayong bugal-bugal ang dating ng kanilang boses sa tv.

Nagtatanong tuloy ang karamihan ng kareristang naroon sa mga OTBs kung alam ng mga anchor ang  problema sa audio.  Nagmumukha kasi silang tanga na dada nang dada gayong hindi naman sila naririnig.

Tinatawagan natin ng pansin ang pamunuan ng Santa Ana.  Bigyan naman ninyo ng magandang coverage ang Sambayanang Karerista.

oOo

Marami ang nalito sa tunay na petsa ng laban ni Nonito Donaire.

Marami ang nag-aabang kahapon na nag-aakala na live ang magiging bakbakan nina Donaire at Vetyeka.

Pero sa pagtataka ng karamihan—tapos na ang nasabing laban at nanalo si Donaire.

He-he-he.  Nasanay kasi ang mga Pinoy boxing fans na Linggo ang laban ng ating mga boksingero.   Parang naka-program sa kanilang isip na ang Sabado sa Las Vegas ay Linggo dito.

Pero hindi naman nga sa Las Vegas ginanap ang laban, kundi sa CotaiArena sa Macau.

Hindi naman po nagkakalayo ang oras doon at sa Pinas.

Anyway, nanalo naman ang ating pambato.

ni Alex L. Cruz