HATAW! D'yaryo ng Bayan hatawtabloid.com
NANAWAGAN ang anti-drugs advocate sa gobyerno na pigilan ang popular boy band One Direction sa kanilang concert sa bansa sa susunod na taon.
Ito ay makaraan lumabas ang video nina Louis Tomlinson at Zayn Malik ng British pop group habang naninigarilyo ng tinatawag nilang “joint” ay naging viral sa internet nitong Miyerkoles.
Ang video clip, nakuha ng Daily Mail newspaper, ay sinasabing kuha ng 22-anyos na si Tomlinson sa likod ng sasakyan sa Peru sa ginanap na South America leg ng world tour ng banda.
Maririnig sina Tomlinson at Malik habang nagbibiruan tungkol sa “illegal substances” na kanilang hinihithit sa likod ng sasakyan.
Ang iba pang miyembro ng banda na sina Harry Styles, Liam Payne, at Niall Horan – sinasabing nasa ibang sasakyan, ay wala sa nasabing video.
Ayon kay Jonathan Morales, founder ng anti-drugs group Laban ng Pamilyang Pilipino, hindi magandang huwaran ang grupo sa mga kabataang Filipino na umiidolo sa kanila.
Nangangamba si Morales na ang nasabing kontrobersiya ay posibleng magpatindi pa sa problema sa illegal na droga ng bansa.
