Tserman timbog sa bala’t baril

LEGAZPI CITY – Hindi nakapalag pa sa mga awtoridad ang isang barangay kapitan nang salakayin ang kanyang bahay sa Brgy. Arado, Uson, Masbate at nakompiska ang ilang mga baril at bala.

Sa tulong ng pinag-isang pwersa ng Uson Municipal Police Station, Masbate Provincial Public Safety Company (MPPSC) at Philippine Army, matagumpay na naisagawa ang search and seizure operation sa bahay ni Brgy. Captain Vicente Hugo Sr. y Cautiber.

Nakuha sa kanyang posisyon ang isang cal. 45 Colt pistol with magazine kasama ang pitong live ammunitions, isang spare magazine laman ang anim na live ammunitions at isang cal. 38 revolver, sa bisa ng warrant of arrest laban sa opisyal.

Samantala, ilang minuto bago ang operasyon ng mga awtoridad, isa pang lalaking kinilalang si Marlon Bon na patungo sa bahay ng kapitan ang inaresto nang makitaan ng cal. 45 Remington pistol na may pitong live ammunitions.

Dinala na sa Masbate Police Provincial Office ang naturang mga ebidensiya para sa tamang disposisyon.