HATAW! D'yaryo ng Bayan hatawtabloid.com
GAGAWIN bukas sa Smart Araneta Coliseum ang best-of-three finals ng PBA D League Foundation Cup na paglalabanan ng North Luzon Expressway at Blackwater Sports.
Ang Game 1 ng serye ay magsisimula sa alas-1:30 ng hapon bago ang dalawang laro ng PBA Governors Cup simula alas-5:45 ng hapon.
Winalis ng Road Warriors ang Cebuana Lhuillier samantalang blinangko ng Elite ang Jumbo Plastic sa kanilang hiwalay na serye sa semifinals.
“I coached poorly. But I do credit Cebuana for this. I’ve learned from this game. Hopefully I could learn and prepare myself for Blackwater,” wika ni NLEX coach Boyet Fernandez pagkatapos na makalusot ang Road Warriors kontra Cebuana Lhuillier, 62-61, noong Martes dahil sa tres ni Kevin Alas at dalawang free throw mula kay Ola Adeogun.
Ang Game 2 ay gagawin sa Lunes, Hunyo 2, sa Mall of Asia Arena simula alas-3:30 ng hapon at kung may Game 3, gagawin ito sa Philsports Arena sa Pasig simula alas-1:30 ng hapon.
Ang Blackwater ay defending champion ng Foundation Cup samantalang sisikapin ng NLEX na mabawi ang titulo na inagawan ng Elite noong isang taon.
Pagkatapos ng finals ng D League ay parehong aakyat na ang NLEX at Blackwater sa PBA bilang mga expansion teams, kasama ang Kia Motors.
Inaayos ngayon ng PBA ang pag-ere ng finals ng D League sa Aksyon TV 41. (James Ty III)
