‘Kawatan’ itinumba

NATAPOS ang maliligayang araw ng pusakal na kawatan, nang pagbabarilin ng tatlong hindi nakilalang suspek, sa Malabon City kahapon ng tanghali.

Dead on the spot ang biktimang si Dennis Salamat, 30-anyos, ng Block 71, 2nd St., Disyerto, Brgy. Tañong ng lungsod, sanhi ng mga tama ng bala ng kalibre .45 at .9mm sa iba’t ibang parte ng katawan.

Naglakad habang papatakas ang tatlong suspek na pawang may takip ng panyo ang mukha na parang walang anumang nangyari na pinaghahanap ngayon ng mga awtoridad.

Sa pinagsamang ulat nina PO3 Cleo Bejar at PO2 Angeles, kapwa may hawak ng kaso, dakong 12:30 p.m. naganap ang insidente sa kanto ng 1st at 2nd St., sa nasabing barangay.

Katatapos lang mananghalian ng biktima at naglakad-lakad muna saka umupo sa ilalim ng isang puno habang naninigarilyo.

Dito lumapit ang tatlong hindi nakilalang suspek saka pinagbabaril si Salamat na tinangka pang tumakbo pero inabot pa rin ng mga bala ang biktima.

Nabatid na si Salamat ay may naka-pending na warrant of arrests dahil sa mga kasong carnapping, holdap at pagnanakaw sa iba’t ibang lungsod.

Limang basyo ng kalibre .45 at .9mm ang narekober sa pinangyarihan ng krimen. (rommel sales)